nen Santiago Villafania

nen inatey so binin salita

binmilonget so sansinakuban

atoor so parles da’y propita

inmagos sankablian ya dala

naorasan ira’y karumsisan

nen inatey so binin salita

nilaknaban na ilem so talba

kauyos na bilay ed kabalgan

atoor so parles da’y propita

ambelat so agew a tinmangoa

nen atiguay so komaduan Adan

nen inatey so binin salita

nalgep ed odiem so inkapalsa

bangta maligsa ira’y duksaan

atoor so parles da’y propita

dia’d ngoro’y pasak iran maruksa

agaoa’y oala ed kasulatan

nen inatey so binin salita

atoor so parles da’y propita

nen Santiago Villafania

O pinablin tambayo na ermen

O katupag na bilay kon aya

pilalek ka ed labin mareen

sindag ka’y lakseb iran biteoen

laut la’y maomameng mon mata

O pinablin tambayo na ermen

dia’d ilalam ka amamayoen

O marikit a musia na uma

pilalek ka ed labin mareen

sempen ka ed natan tan arapen

biskeg ka ed ikapoy na oalna

O pinablin tambayo na ermen

anggapo’y ey-ey ya ag anlongen

lapu ed inpangaro ed sika

pilalek ka ed labin mareen

say patey man sarag kon sugbaen

ed ngara’y aron yalay ed sika

O pinablin tambayo na ermen

pilalek ka ed labin mareen