March 20, 2006
Pangasinan Poem: Villanelle 12
Villanelle 12
O pinablin tambayo na ermen
O katupag na bilay kon aya
pilalek ka ed labin mareen
sindag ka’y lakseb iran biteoen
laut la’y maomameng mon mata
O pinablin tambayo na ermen
dia’d ilalam ka amamayoen
O marikit a musia na uma
pilalek ka ed labin mareen
sempen ka ed natan tan arapen
biskeg ka ed ikapoy na oalna
O pinablin tambayo na ermen
anggapo’y ey-ey ya ag anlongen
lapu ed inpangaro ed sika
pilalek ka ed labin mareen
say patey man sarag kon sugbaen
ed ngara’y aron yalay ed sika
O pinablin tambayo na ermen
pilalek ka ed labin mareen
